Om lærebedrifter og samarbeidsorgan for lærebedrifter (opplæringskontor)

Lærebedrift

Ei lærebedrift er ei bedrift, offentleg etat eller institusjon, som er godkjend av fylkeskommunen for å ta inn lærlingar/lærekandidatar. Dette betyr at bedrifta har høve til å tilby praktisk opplæring i eit fag som fører til fag- eller sveinebrev.

For å bli godkjent må lærebedrifta kunna gi deg den opplæringa som er fastsett i læreplanen for faget, og han må ha ein fagleg kvalifisert person (fagleg leiar) som er ansvarleg for opplæringa. Opplæringa må i størst mogleg grad tilpassast evnene, interessene og føresetnadene til lærlingen eller lærekandidaten.

Samarbeidsorgan for lærebedrifter (opplæringskontor)

Eit samarbeidsorgan for lærebedrifter, ofte kalla opplæringskontor, er ein organisasjon som hjelpar godkjende lærebedrifter med å ta inn og følgja opp lærlingar. Samarbeidsorganet fungerer som eit bindeledd mellom lærebedriftene og fylkeskommunen. Dei hjelper med å rekruttera lærlingar og rettleiar både lærlingar og lærebedrifter gjennom læreperioden.

Kvar enkelt bedrift som inngår i samarbeidsorganet (opplæringskontoret) må vera godkjent som lærebedrift.

Du teiknar lærekontrakt/opplæringskontrakt med lærebedrifta, som er juridisk ansvarleg for kontrakten. Opplæringa kan du få i éin eller fleire av medlemsbedriftene. Der du får opplæring, skal det vera ein fagleg leiar som er ansvarleg for opplæringa.

Opplæringsring

Lærebedrifter som ikkje kan gi ein lærling/lærekandidat opplæring åleine, kan gå saman om å danna ein opplæringsring for å samarbeida om opplæringa av lærlingar/lærekadidatar. For at den samla læretida din skal dekkja alle elementa i læreplanen eller den individuelle opplæringsplanen, får du i løpet av læretida også opplæring i andre bedrifter i opplæringsringen. Alle bedriftene i ringen skal vera godkjende lærebedrifter og ha ein fagleg kvalifisert person som har ansvaret for opplæringa di. Sjølv om du får opplæring i fleire bedrifter, teiknar du kontrakt med den bedrifta som har hovudansvaret for opplæringa av deg.

Rettane og pliktene til lærebedrifta

Lærebedriften skal skapa eit godt arbeidsmiljø. Den har plikt til å laga ein intern plan for opplæringa di og gi deg opplæring som tilfredsstiller krava i læreplanen eller den individuelle opplæringsplanen som er utarbeidd for deg. Lærebedrifta skal også gi deg rettleiing og vurdering, sjå .

Dersom du har behov for at noko av opplæringa blir gitt av andre enn lærebedrifta, til dømes opplæring i skule i løpet av læretida, skal du givast fri for å kunna delta i slik opplæring. Arbeidstida og opplæringstida di skal til saman ikkje overskrida arbeidstida som gjeld for andre arbeidstakarar i faget.

Er du lærling, skal lærebedrifta melda deg opp til den fag-/svenneprøven som blir nærast halde utløpet av læretida. Er du lærekandidat, vil du ved slutten av kontraktstida få høve til å gå opp til ei kompetanseprøve som viser det nivået opplæringa har ført fram til. Ved prøveavlegginga skal lærebedrifta stilla til rådvelde nødvendig arbeidsplass, materiale og verktøy. Eit eventuelt produkt blir eigedommen til lærebedrifta.