Studerengelbbolašvuohta

Oppalaš studerengelbbolašvuohta

Go olahat oppalaš studerengelbbolašvuođa, de sáhtát ohcat eanaš oahpuide universitehtaide ja allaskuvllaide. Studerengelbbolašvuohta iešalddes ii dáhkit ahte beasat ohppui, dus galget maid leat doarvái buorit árvosánit universitehtaid dahje allaskuvllaid gáibádusaid ektui.

Mo juvssat oppalaš studerengelbbolašvuođa?

Don olahat oppalaš studerengelbbolašvuođa go čađahat ja ceavzzát Jo1-, Jo2- ja Jo3-ceahkis studeremii ráhkkanahtti oahppoprográmmain:

• Valáštallanfágat
• Dáidda, design ja arkitektuvra
• Media ja gulahallan
• Musihkka, dánsun ja drámá
• Oahppospesialiseren

dahje dan láhkai, ahte čađahat ja ceavzzát Jo1-, Jo2 ja Jo3-ceahkis dáin fidnofágalaš oahppoprográmmain:

• Luonddudoallu, mas lea studeremii ráhkkanahtti Jo3
• Ođđa fidnofágalaš oahppoprográmma (Jo1 ja Jo2 dahje olahuvvon fidnogelbbolašvuohta) + Jo3 oppalaš studerengelbbolašvuođa lasáhus

Erenoamáš ohppuiváldingáibádusat

Oppalaš studerengelbbolašvuođa lassin leat muhtun oahpuin maiddái erenoamáš ohppuiváldingáibádusat,mii dábálaččat mearkkaša ahte don galggat leat čađahan dihto fágaid (dábálaččat reálafágaid). Muhtin oahpuide lea ohppuiváldiniskkus.